მსგავსი სიტუაცია შეიქმნა უკანასკნელ ორ შეხვედრაში, იმ განსხვავებით, რომ ახლა ბასკი თამაშობდა, მაგრამ თამაშობდა ძალიან სუსტად. ჩაბი ალონსოს ორი ჩაგდებული თამაში - გუნდის ორი მარცხი.
ტრავმის შემდეგ ესპანელი ნახევარმცველი სრულყოფილად ლა ლიგის მე-11 ტურში, სწორედ "სევილიის" წინააღმდეგ შეხვედრაში დაბრუნდა. მას შემდეგ თეთრებმა 31 მატჩის განმავლობაში არ ჰქონდათ განცდილი მარცხის გემო. ეს იყო "ალონსოს ეფექტი", რომელიც გაქრა ეგრევე, როგორც კი ფეხბურთელი ფორმიდან ამოვარდა. ჩაბიმ ამ სერიიდან 29 შეხვედრაში ითამაშა, რაც გუნდის შედეგებში მის ღვაწლს დიდ ხაზს უსვამს.
გარდა ამისა, ალონსომ "შალკესთან" საპასუხო, არაფრისმომცემ შეხვედრაშიც ითამაშა დროის გარკვეული ნაწილი და როგორც შემდეგ აღმოჩნდა, შესაძლოა სწორედ ამან იქონია მასზე ნეგატიური გავლენა. "ბარსას" წინააღმდეგ მან აიკიდა სრულიად უსაფუძვლო ჯარიმა, რომელსაც მეორე პენალტი მოჰყვა. გარდა ამისა, მან რამდენიმე სერიოზული შეცდომა დაუშვა, როდესაც მცველებისგან იღებდა ბურთს. "სევილიასთან" ყველა სრულიად განსხვავებულ გუნდს და ჩაბი ალონსოს ელოდა, მაგრამ სიტუაცია ფაქტობრივად იგივე დარჩა. ბასკმა არაზუსტი გადაცემა გააკეთა, რომელსაც მასპინძელთა სწრაფი კონტრშეტევა და "რეალის" კარში პირველი გატანილი გოლი მოჰყვა.
ციფრები არ იტყუებიან. "კლასიკოში" ალონსომ მხოლოდ 39-ჯერ მიიღო ბურთი, ეს კი "რეალის" საყრდენი ნახევარმცველისთვის დაუჯერებლად დაბალი მაჩვენებელია. იქმნებოდა შთაბეჭდილება, რომ ალონსო საერთოდ მოედანზე არ იმყოფება. "სევილიასთან" შეხვედრაში კი, ის ბურთს იმაზე ხშირად კარგავდა, ვიდრე ოდესმე. მისი არაზუსტი პასების საშუალო მაჩვენებელი მიმდინარე სეზონში 12 პროცენტს შეადგენს, "სანჩეს პისხუანზე" კი 16%-მდე აიწია. ალონსო ბურთით 76-ჯერ აღმოჩნდა და 12-ჯერ დაკარგა ის. ერთერთი დაკარგვა გუნდს ძალიან ძვირად დაუჯდა.