კარგად მოგეხსენებათ, რომ გუშინ გაიმართა ბოლო ორი მეოთხედფინალური შეხვედრა. ეხლა გუნდები ერთი კვირა დაისვენებენ და 8 აპრილიდან კვლავ შეუდგებიან საქმეს. როგორც მოსალოდნელი იყო მეოთხედფინალური ეტაპის პირველი მატჩები ძალიან საინტერესო გამოდგა, ისეთი როგორიც უნდა ყოფილიყო. შემთხვევითი სულაც არ ყოფილა ის ფაქტი, რომ 8 საუკეთესო გუნდს შორის მოხვდნენ ჯგუფის პირველ ადგილოსნები. ეს 8 გუნდი მართლაც საუკეთესოა მსოფლიოში და აბსოლიტურად დამსახურებულად თამაშობს ჩემპიონთა ლიგის მეოთხედფინალში. ვიხილეთ ორი ძალიან საინტერესო და დაძაბული ტაქტიკური დაპირისპრიება კამპ ნოუზე და პარკ დე ფრენსზე. აგრეთვე ვიხილეთ დიდებული სანახაობა სანტიაგო ბერნაბეუზე, გახსნილი და ლაღი ფეხბურთი ორი შესანიშნავი გუნდის შესრულებით. ალბათ უფრო მეტს ველოდით "მანჩესტერ იუნაიტედისა" და "ბაიერნის" დაპირისპირებიდან, მაგრამ თუ რამე დაგვაკლო რომელიმე გუნდმა ეს პირველ რიგში რეკორდმაისტერია, რომელიც 12 წუთიან ინტერვალს თუ არ ჩავთვლით ფაქტიურად იდგა და აგორავებდა ბურთს აქეთ-იქით. მიუხედავად ამისა არამგონია ვინმე იმედგაცრუებული დარჩენილიყო ამ თამაშებით. შესაძლოა ზოგის საყვარელმა გუნდმა ვერ მაოხერხა სასურველი შედეგის დაფიქსირება, მაგრამ ჩვენ ხომ პირველ რიგში ფეხბურთის გულშემატკივარი ვართ.
ბარსელონა - ატლეტიკო
ჩემპიონთა ლიგის ისტორიაში უკვე მეოთხედ უპირისპირდებიან ერთმანეთს ესპანური გუნდები ფლეი-ოფში. აღსანიშნავია, რომ ოთხივე ორმატჩიანი ორთაბრძოლის მონაწილე "ბარსელონაა", რომელმაც 2000 წელს "ვალენსიასთან" წააგო, 2002-ში "რეალთან", 2011 წელს კი ამჯერად გამოაგდო სამეფო კლუბი. ვნახოთ როგორ დასრულდება მეოთხე მცდელობა. კამპ ნოუზე გასამართ მატჩს ორივე გუნდი პოზიტიური ფსიქოლოგიური განწყობით შეხვდა. შემადგენლობების მხრივ კი კატალონიურ გრანდს ვიქტორ ვალდესი დაემტვრა, დანარჩენები კი მზად იყვნენ. აი "ატლეტიკოსაც" ყველაფერი მწყობრში ჰქონდა თუ არ ჩავთვლით დიეგო კოშტას დაზიანეას, რომელიც უფრო სერიოზული აღმოჩნდა ვიდრე მოელოდნენ. საუკეთესო თერთმეტეულებით საკმაოდ საინტერესო, დაძაბული და ტაქტიკური ელემენტებით დატვირთული თამაში ვიხილეთ. საწყის წუთებში საკმაოდ აქტიურად გამოიყურებოდნენ სტუმრები და დავიდ ვილას 100%-იანი მომენტიც ჰქონდა, რომელიც სამწუხაროდ ვერ გამოიყენა. პირველი 5 წუთის შემდეგ კი "ბარსამ" დააწესა კონტროლი ბურთზე და ბოლო წამებამდე ფლობდა უპირატესობას ამ მხრივ. პირველმა 45 წუთმა ისე ჩაიარა, რომ ყველაზე რეალური მომენტი ჰქონდა ანდრეს ინიესტას, რომელიც ლიონელ მესის ფენომენალური პასით მეკარესთან დარჩა თითქმის მარტო, მაგრამ იმ შეხვედრაში უშეცდომო დიეგო გოდინმა ვარდნით განმუხტა სიტუაცია. მადრიდელებმა სერიოზული წინააღმდეგობა გაუწიეს კატალონიელებს. შესანიშნავი პრესინგი, ორმაგი მეურნეობა "ბარსას" შემტევებზე და კოლექტიური ართმევები საკმაოდ სერიოზულ ფიზიკურ დატვირთვას მოითხოვს, რისთვისაც "ატლეტიკო" პირველ ტაიმში იდეალურად იყო მომზადებული. აუცილებლად უნდა ვთქვათ, რომ შეხვედრის მე-8 წუთზე ბარძაყის დაზიანება მიიღო ხერარდ პიკემ და ერთი თვე ვერ შეძლებს თამაშს. მის ნავლად მარკ ბარტრა გამოვიდა და პირველი ტაიმის დარჩენილ დროში არაერთი კარგი შეტევა ჩაუშალა სტუმრებს. შეხვედრის მეორე ნახევარიც ანალოგიურად დაიწყო, "ატლეტიკომ" განაგრძო თავის სტილში თამაში და 57-ე წუთზე შეცვლაზე შემოსულმა დიეგომ გაიტანა ფენომენალური გოლი. აქედან მოყოლებული კი მადრიდული გუნდი ფორმალობად იქცა კამპ ნოუზე. "ბარსამ" ჩართო სისწრაფეები, კომბინაციები, ტექნიკური თამაში და სიმეონესს მოთამაშეები 5-10 წუთში ენა გადმოგდებულები დარბოდნენ. საუკეთესო იყო ვეტერანი გოდინი, რომელმაც პოზიციურად ზუსტად, ინდივიდუალურად სუფთად და კედელივით იმოქმედა, აგრეთვე მეორე სართულზე იყო მშვენიერი და დროულად ანხორციელებდა ვარდნებს. უნდა შევაქოთ მირანდაც, ფელიპე ლუისიც, რომელმაც დაუშვა რამოდენიმე შეცდომა, მაგრამ მაინც ჯამში დადებითად უნდა შევაფასოთ მისი თამაში. კოკე, გაბი, ტიაგო, თურანი საერთოდ არ ფიქრობდნენ შეტევაზე და დაკავებულნი იყვნენ ბურთის საჯარიმოდან გამოტანით ანდაც ატანით მოედნის ცენტრამდე, სადაც ბუსკეცი ერთი მარტივი მოძრაობით იბრუნებდა ხოლმე. ესე "ატლეტიკო" ვერ გაძლებდა და 71-ე წუთზე გენიალურმა ანდრეს ინიესტამ გენიალური პასი გაუკეთა ნეიმარს და მანაც შეაგდო. ტყუილად არ ადარებენ ინის ზენედინ ზიდანს, სწორედ ზიზუს სტილში გააკეთა ანდრესმა საგოლე პასი და არ დაუწყია ბურთის ქვედა ტერფზე მოჯდომა. ინი მთელი მატჩის განმავლობაში შესანიშნავად დირიჟორობდა გუნდს და აშკარაა, რომ ინი სეზონის ყველაზე მნიშვნელოვან ნაწილს საუკეთსო ფორმაში ხვდება. დარჩენილ დროში კატალონიელები უტევდნენ, ურტყამდნენ, მაგრამ საწადელს ვერ მიაღწიეს. "ატლეტიკომ" შეინარჩუნა ფრე, რომელიც ალბათ ლოგიკური და სამართლიანი შედეგი გახლდათ. საუკეთესოდ ორივე გუნდის რიგებში ადნრეს ინიესტა დასახელდა. სასიხარულოა, რომ შეხვედრის მთავარ არბიტრს ფელიქს ბრიხს არ დაუშვია შეცდომები.
მანჩესტერ იუნაიტედი 1:1 ბაიერნი
ეს ორი მსოფლიო ფეხბურთის გრანდი აქამდე არაერთხელ შეხვედრიან ერთმანეთს. ჩემპიონთა ლიგის ფლეი-ოფში აქამდე ორიდან ორივე შემთხვევაში მიუნხენის "ბაიერნმა" გამოთიშა ტურნირს "მანჩესტერ იუანაიტედი", თანაც ორივეჯერ მეოთხედფინალში. მესამე საფლეი-ოფო დაპირისპირებას უდიდესი დანაკლისით შეხვდა "მანჩესტერ იუნაიტედი". დისკვალიფიკაცირებული პატრის ევრას ადგილი მარცხენა ფლანგზე ახალგაზრდა ალექსანდრ ბიუტნერმა დაიკავა. ტრავმის გამო ვერ მიიღეს მონაწილეობა რაფაელმა, კრის სმოლინგმა, ჯონი ევანსმა და რობინ ვან პერსიმ. სწორედ ამიტომ დევიდ მოიესმა დაცვის მარჯვენა ფრთაზე გადაწია ფილ ჯონსი ცენტრში კი თავის დროზე მსოფლიოში ერთ-ერთი საუკეთესო დუეტი დააყენა: რიო-ნემანია. ნახევარდაცვაში მოიესმა რაიან გიგზი დააყენა, შემტევი ტრიო კი უელბეკით, უეინ რუნით და ანტონიო ვალენსიათი დააკომფლექტა. პეპ გვარდიოლას პრობლემები ნაკლებად ჰქონდა, დისკვალიფიკაციას იხდიდა დანტე, ტაიგო კი ტრავმირებული გახლავთ. დაცვის ცენტრში თამაში ხავი მარტინესს მოუწია. ფილიპ ლამი კვლავ ცენტრში მოგვევლინა ამჯერად ბასტიან შვაინშტაიგერთან ერთად, შემტევი ტრიო მოსალოდნელი იყო: რობენი, კროოსი, რიბერი წინ კი ცრუცხრიანის სახით ტომას მიულერი გაამწესა. ფელიქს ბრიხისგან განსხვავებით ველასკო კარბალიომ პირველივე წუთებზე დაუშვა შეცდომა. საქმე იმაშია, რომ მანკუნიანელებმა მიბაძეს "არსენალს" და საწყისი წუთები აქტიურად დაიწყეს, რასაც დანი უელბეკის გოლი მოჰყვა. გოლი არ ჩაითვალა. თავიდან იყო ვარაუდი, რომ ინგლისელმა ითამაშა ხელით, მაგრამ განმეორების ნახვის თანავე ეს აზრი გაქრა. შემდეგ როგორც უეფას საიტზე დაიწერა კარბალიომ შენიშნა უხეში თამაში უელბეკის მხრიდან, რაც მემგონი ასევე შეცდომაა. თუ ობიექტურად შეხვედავთ ეს იყო ჩვეულებრივი ორთაბრძოლა, სადაც დანის მხრიდან უხეშობას ნაკლებად ჰქონდა ადგილი. სასტარტო აქტიურობის შემდეგ კი "ბაიერნმა" ჩაიგდო ბურთი და წავიდა...დაგორავდა საკმაოდ ლამაზი მრგვალი ფორმის სპორტული ინვენტარი აქეთ-იქით და ერთადერთი მაშინ მიდიოდა კარისკენ, როდესაც არიენ რობენის ასევე ლამაზ ბუცებს ეხებოდა. ჰოლანდიელმა გააწამა მისი ახალგაზრდა თანამემამულე და ერთ-ერთ გასროლას მოჰყვა დავიდ დე ხეას შესანიშნავი სეივი. აქედან რამოდენიმე წუთში კი იმავე რობენის დარტყმის შემდეგ ბურთი აშკარად ხელზე მოხვდა ბიუტნერს, მაგრამ კარბალიომ არაო. ამ გორაობა-გორაობის დროს კი მარტინესი-ბოატენგიც საკმაოდ მაღლა იყვნენ აწეულნი, როდესაც დე ხეამ სწრაფად შეიყვანა თამაშში ბურთი, მოედნსი ცენტრში რუნი დატრიალდა და ერთ-ერთზე დატოვა უელბეკი, ამბიციურმა და ტექნიკურმა ყმაწვილმა ნოიერის თავს ზემოთ გადაწყვიტვა ბურთის გადაგზავნა, მაგრამ არ გამოუვიდა. პირველი ტაიმი დასრულდა უგოლო ფრით. მეორე ტაიმში არ შეცვლილა სურათი, "მანჩესტერი" საკმაოდ კარგად იცავდა თავს, ძალიან სახიფათო იყო კონტრშეტევებზე, "ბაიერნი" კი იდგა. კუთხურის დროს კი 57-ე წუთზე, იუმორისტულად რომ შეხვედოთ ნემანია ვიდიჩი უჩინმაჩინის ქუდით აღმოჩნდა საჯარიმოში, რეალურად კი სერბ მცველს გზა დაულოცეს მიუნხენელებმა და მანაც საკმაოდ რთული დარტყმა შეასრულა, მაგრამ ზუსტად - 1:0. აი ამის შემდეგ კი "ბაიერნი" მთელი ძალებით წავიდა წინ და როგორც იქნა ვიხილეთ ფეხბურთი. პეპმა გამოიყვანა მარიო მანჯუკიჩი, რომლის თავური პასითაც ბასტიმ აღადგინა წონასწორობა - 1:1. აღსანიშნავია, რომ ამ დროს რაფინია როდესაც აწვდიდა მარიო მანჯუკიჩზე მარუან ფელაინი მიჰყვებოდა საჯარიმოსკენ მიმავალ ბასტის, მაგრამ რატომღაც გაჩერდა და წინააღმდეგობა ვერ გაუწია გერმანელ მოთამაშეს. საერთოდ ფელაინიმ ამაზრზენი მატჩი ჩაატარა, ორთაბრძოლები ფაქტიურად ყველა წააგო და პასებიც დიდად არ გამოსდიოდა. დარჩენილ წუთებში კარგი შანსი ჰქონდა რობენს, იმავე რობენმა და რიბერიმ კარგი კომბინაცია გაითამაშეს, რომელიც ვერ დააგვირგვინეს სტუმრებმა. ყველაზე მნიშვნელოვანი მომენტი კი 89-ე წუთზე მოხდა, როდესაც რუნის საჯარიმოდან გამოდიოდა ბურთთან ერთად და ბასტიმ ვარდნა განახორცეილა...აბსოლიტურად უწყინარი ე.წ პატკატი, მართალია ბასტი ვერ მიწვდა ბურთს, მაგრამ არც რუნის შეხებია. თუმცა კარბალიოს სისხლში ესპანური სისხლი უჩქეფს და ბასტის მეორე ყვითელი უჩვენა. მატჩი 1:1 დასრულდა, სამართლიანად რადგან იმსახურებდა "მანჩესტერი" ამას, მიუნხენში კი რეკორდმაისტერს ბასტი და ხავი მარტინესი არ ეყოლება. ალბათ ყველანი ვეთანხმებით შტეფან ეფენბერგის კომენტარს, რომელმაც აღნიშნა, რომ კონკრეტულ თამაშში "მანჩესტერს" შეუძლია "ბაიერნის" დამარცხებაო. ჩემპიონთა ლიგა არის ყველაზე განსხავავებული ტურნირი, აქ თითოეულ წვრილმანს აქვს დიდი მნიშვნელობა, ამიტომ ხშირად არც თუ ისე კარგ ფორმაში გუნდებიც ახერხებენ თავის კარგად წარმოჩენას მაქსიმალური შრომით, დიდი მონდომებით და რაღათქმაუნდა პროფესიონალიზმით. ესე იყო "მანჩესტერიც", რომელმაც იბრძოლა და ღირსეული თამაში აჩვენა საკუთარ სტადიონზე. ვეტერანმა ნემანია ვიდიჩმა ჩაატარა უნიკალური შეხვედრა, მიუხედავად მისი ასაკისა. ძალიან კარგი იყო რიო ფერდინანდიც, არადა ინგლისელი საკმაოდ ცუდ სეზონს ატარებს, ეს კინამდვილად საამაყო ფაქტია "მანჩესტერის" ქომაგებისთვის და სამაგილოთა ნებისმიერი გუნდისთვის. რა მოხდება გერმანიაში ამას 9 აპრილს გავიგებთ.
რეალი 3:0 დ.ბორუსია
ლუკაშ პიშჩეკი, მატს ჰუმელსი, ნევენ სუბოტიჩი, მარსელ შმელცერი, სვენ ბენდერი, ილქაი გიუნდოგანი, სებასტიან კელი, იაკუბ ბლაშიკოვსკი, მარკო როისი - ეს არის იმ ფეხბურთელთა ჩამონათვალი, რომლებმაც ამ სეზონში მინიმუმ 1 თვე მაინც გამოტოვეს, არადა შარშანდელ ფინალში კელის გამოკლებით ყველამ მიიღო მონაწილეობა. გუშინ კი ამ სიიდან კლოპის განაცხადში მხოლოდ პიშჩეკი, ჰუმელსი, კელი და როისი იყვნენ. თუ გავიხსენებთ გასულ სეზონს, იმ შემადგენლობიდან, რომელმაც მადრიდის "რეალს" მოუგო 4:1, ჯანმრთელი მხოლოდ რომა ვაიდენფელერი, პიშჩეკი, ჰუმელსი და როისი არიან. ტრავმების ეპიდემიას დაემატა ლევანდოვსკის არ ყოფნაც, რაზეც იურგენ კლოპმა აღნიშნა, რომ გუნდი არ იყო მზად მის გარეშე სათამაშოდ. თუმცა სტატისტიკიდანაც კარგად ჩანს, რომ სწორედ ეს შეხვედრა იყო ყველაზე სანახაობრივი. მიუხედავად უამრავი პრობლემისა კლოპის "ბორუსიამ" ითამაშა გახსნილი, შემტევი, ლაღი ფეხბურთი და ლევანდოვსკი რომ ყოფილიყო მინდორზე ალბათ არ დარჩებოდნენ გერმანელები უშანსოდ. სამეფო კლუბმა გასული სეზონის მსგავსად საწყის 15 წუთში შავი დღე აყარა "დ.ბორუსიას", მაგრამ განსხვავება ისაა, რომ გარეთ ბეილმა მესამე წუთზე კარვახალის დროული ჩართვის შედეგად გახსნა ანგარიში. ამის შემდეგ გმირი გახდა ვაიდენფელერი, 15 წუთის შემდეგ კი ცოტა ამოისუნთქა "ბორუსიამ". თამაში გათანაბრდა, მაგრამ "რეალი" დაცვაში ფანტასტიკურად მოქმედებდა, ცენტრი კი მოდრიჩსა და ისკოს ჰქონდათ აღებული. ხაბი ალონსო თავისმხრივ იდეალურად შლიდა მეტოქის შეტევებს. 27-ე წუთზე კი ჰენრიკ მხითარიანმა მიუტევებელი შეცდომა დაუშვა, ჩააბარა ბურთი ისკოს საჯარიმოს მისადგომებთან და მანაც შეაგდო - 2:0. პირველ ტაიმში აღარაფერი შეცვლილა, მადრიდელებმა დამაჯერებლად იმარჯვეს. მეორე ნახევარში კი "რეალმა" დაუთმო ინიციატივა მეტოქეს და დაელოდა საკუთარ შანსს. ძალიან კარგი მომენტი ჰქონდა ობამეიანგს, რომელიც საერთოდ ტყუილად დარბოდა ბერნაბეუს გაზონზე. ანჩელოტის გეგმამ შედეგი გამოიღო და კონტრშეტევაზე კრიშტიანო რონალდომ გამანადგურებელი გახადა ანგარიში. ამის შემდეგ დორტმუნდელებს არაერთი რეალური მომენტი ჰქონდათ, მაგრამ რას იზამ, როდესაც გყავს მარკო როისი და მასზე იდეალურად მოქმედებენ, უყურადღებოდ დატოვებული ობამეიანგი და მხითარიანი კი ერთი-მეორეს მიყოლებით ანიავებენ მომენტებს. პეპე და კარვახალი იყვნენ ფენომენალურნი, განსაკუთრებით პორტუგალიელი, რომელიც გმირულად იბრძოდა და ფაქტიურად ყველა ბურთზე ასწრებდა მეტოქე გუნდის სწრაფ შემტევებს. ამ ყველაფერს თან სდევდა "რეალის" ძალიან სახიფათო კონტრშეტევებიც, განსაკუთრებით ალვარო მორატას გამოსვის შემდეგ, თუმცა მოწოდების სიმაღლეზე იყო ვაიდენფელერი და თითქმის გაუვალი იყო მატს ჰუმელსი. "ბორუსიას" მცველმა ჩინებული შეხვედრა ჩაატარა, იბრძოლა მოედნის თითოეულ მონაკვეთზე და საუკეთესო იყო თავისი გუნდის რიგებში. ალბათ სასაცილოა ისიც, რომ "ბორუსიამ" სკამიდან გამოუცდელი ჰოფმანი, იოჟიჩი და უმაქნისი შიბერი გამოიყვანა. თუმცა სხვა ვარიანტი არც ყოფილა. იოჟიჩს კოჭებში ეტყობა, რომ უნიჭიერესია და იმ ორი მოთამაშესავით არ დაბნეულა საკმაოდ კარგად ჩერთო თამაშში და პენალტიც მოიპოვა, რომელიც კლატენბურგმა არ დანიშნა. ალონსომ აშკარად წააქცია ახალგაზრდა ფორვარდი. საბოლოოდ შეხვედრა დასრულდა ესე, მადრიდელებმა აიღეს რევანში და ფაქტიურად გაინაღდეს შემდეგი ეტაპის საგზური. კომპლიმენტები კარლო ანჩელოტის, რომელიც ეჭვს ტოვებს, რომ აშკარად მეათე თასს უმიზნებს და მისთვის მეორეხარისხოვანია სხვა ტურნირები. ყოველშემთხვევაში "რეალი" ლიგაზე რადიკალურად გასნხვავებული მონდომებით თამაშობს. იურგენ კლოპს კი ვინც დაზრახავს, მას უბრალოდ არ ესმის ფეხბურთი. შაჰინი, რომელიც ბუნდესლიგაში მიმდინარე სეზონში ერთ-ერთი საუკეთესოა თავის პოზიციაზე საერთოდ გამოთიშული და უსარგებლო იყო, კელიც უკვე ასაკშია, ობამეიანგი-მხითარიანის "გენიალურობაზე" უკვე ვისაუბრეთ, როისი და ჰუმელსი კი მარტო ვერაფერს გააწყობენ ასეთი "რეალის" წინააღმდეგ. კარგია ის, რომ იურგენმა არ დააყენა 10 კაცი უკან, თორემ არამგონია "ბორუსიას" 3 გოლი გაეშვა და ჩვენ, გულშემატკივარს ასეთი სანახაობა გვენახა. თუმცა მისი ფილოსოფია მხოლოდ ტაბლოთი არ შემოიფარგლება და მიუხედავად ცუდი შედეგისა მასზე ცუდს ვერავინ იტყვის. ვესტფალენზე გერმანელები უბრალოდ ეცდებიან, რომ ღირსეულად დატოვონ ევროპის ყველაზე პრესტიჟული ტურნირი.
პსჟ 3:1 ჩელსი
პარკ დე ფრენსზე ძალიან საინტერესო და დაძაბული შეხვედრა ვიხილეთ. ფრანგებს არანაერი პრობლემა არ ჰქონია შემადგენლობის მხრივ, ისევე როგორც ინგლისელებს. როგორც მოსალოდნელი იყო აბსოლიტურად თანაბარი თამაში მიდიოდა, მაგრამ გაიმარჯვა გუნდმა, რომელიც უფრო ეფექტური აღმოჩნდა შეტევაში. ანგარიში მალევე გაიხსნა მას შემდეგ რაც მარცხენა ფლანგიდან ჩაწოდების შემდეგ ჯონ ტერიმ ბურთი უხეიროდ მოიგერია, ეზიკილ ლავესი კი საჭირო დროს საჭირო ადგილას აღმოჩნდა და უძლიერესი დარტყმით წინ გაიყვანა თავისი გუნდი. ამის შემდეგ "ჩელსიმ" მოუმატა და მოიპოვა უპირატესობაც. ერთ-ერთი შეტევის დროს ზლატან იბრაჰიმოვიჩს რამირესმა აართვა ბურთი და დაიძრა წინ, ბრაზილიელმა ბევრი ირბინა და ბოლოს საჯარიმოში დაუგორა ოსკარს, რომელიც ტიაგო სილვამ წააქცია. არბიტრმა აშკარა თერთმეტმეტრიანი დანიშნა, რომელიც ედენ აზარმა აქცია გოლად. დარჩენილმა წუთებმა სრულ თანაბარდობაში ჩაიარა და აღსანიშნავია ცენტრში საკმაოდ სერიოზული ორთაბრძოლები. მეორე ნახევარი კი უკვე მასპინძლების იყო. ფანტასტიკური თამაში აჩვენა ახალგაზრდა მარკო ვერატიმ, რომელმაც იდეალურად დაიჭირა ბურთი და ასევე მეთაურობდა "პსჟ"-ს შეტევებს. მატუიდი და ტიაგო მოტა კი ჩამშლელის ფუნქციებს იდეალურად ითავსებდნენ, რამაც გამოიწვია "ჩელსის" კონტრშტევების ნაკლები სიმწვავე. ასევე უნდა ითქვას, რომ კრისტოფ ჟალემ შესანიშნავად იმოქმედა თავის ფლანგზე და აზარი გააქრო მოედნიდან. ტერიტორიულ უპირატესობას დაეუფლა ლორან ბლანის გუნდი, მაგრამ რეალურ მომენტებამდე საქმე არ მიდიოდა. 61-ე წუთზე კი "პსჟ"-მ მოაწოდა ჯარიმა, ჩეხმა რატომღაც ძალიან პასიურად ითამაშა და ბოლოს ბურთი დავიდ ლუიზს მოხვდა, რის შემდეგაც გაეხვა კარის ბადეში. ლონდონელებმა ცადეს ანგარიშის გათანაბრება, მაგრამ მასპინძელი გუნდი ძალიან საიმედო იყო მოედნის ცენტრში, თანაც არისტოკრატებიც არ იკლავდნენ თავს, 1:2 მათთვის ცუდი შედეგი არ ყოფილა ნამდვილად. თუმცა შეცვალზე შესულმა ხავიერ პასტორემ 93-ე წუთზე დადგა სუპერშოუ, ფლანგზე მოატყუა ასპილიკუეტა, გარი კეჰილი და ახლო კუთხეში გაუძვრინა ბურთი ჩეხს. ფრანგებმა საკმაოდ კომფორტული უპირატესობა მოიპოვეს და ამ წყვილში ფავორიტად სწორედ "პსჟ" იქცა, მაგრამ "ჩელსი" რათქმაუნად მაქსიმუმს გააკეთებს სტემფროდზე და შეეცდება, რომ აღმოფქვრას ჩამორჩენა. ყოველ შემთხვევაში განმეორებითი თამაში გაცილებით სანახაობრივი უნდა გამოვიდეს და ნაკლებად საინტერესო ტაქტიკური თვალსაზრისით, რადგან "ჩელსის" მხოლოდ და მხოლოდ შეტევა სჭირდება.
აი ასეთი მეოთხედფინალები ვიხილეთ 1 და 2 აპრილს. ეხლა ყუდაღება მივაქციოთ ევროპის ლიგას და შემდეგ სამშაბათ-ოთხშაბათს დაველოდოთ მორიგ სუპერდაპირისპირებებს, რომლებიც კიდევ უფრო დიდ ინტერესს იწვევს.
