"ბორუსიას" ძირითადი გოლკიპერი ისევ რომან ვაიდენფელერია. მიუხედავად ბოლოდროინდელი შეცდომებისა, 33 წლის გოლკიპერი გუნდში ისევ ნომერ პირველია და როგორც ჩანს, რომანი მუნდიალზე გერმანიის ნაკრების მეორე მეკარე იქნება.
დაცვა
სეზონის მსვლელობისას, იურგენ კლოპის გუნდის მთავარ პრობლემას დაცვის ხაზი წარმოადგენდა. ნევენ სუბოტიჩმა ტრავმა ჯერ კიდევ ნოემბრის დასაწყისში მიიღო... მატს ჰუმელსი მხოლოდ ერთი თვის წინ ჩადგა მწყობრში და საუკეთესო კონდიციებისგან ჯერ კიდევ შორსაა. ცუდად ასპარეზობს ლუკას პიშჩეკი, რომელსაც ორი წლის წინ "რეალს" აქტიურად უკავშირებდნენ. სავარაუდოდ, მეოთხედფინალის პირველ მატჩს მარსელ შმელცერი გამოტოვებს, რომელმაც გასული სეზონის ჯგუფურ ეტაპზე "სამეფო კლუბს" გოლი გაუტანა. დიდი ხანია კლოპი იძულებულია მარცხენა მცველად კევინ გროსკროიცი გამოიყენოს.
ნახევარდაცვა
"რეალთან" სვენ ბენდერი და ილკაი გიუნდოგანი ნამდვილად ვერ ითამაშებენ. Marca-ს ცნობით, ეს უკანასკნელი ზაფხულში "სამეფო კლუბის" ფეხბურთელი გახდება. როგორც ჩანს, კლოპმა ნახევარდაცვის ცენტრში შაჰინი–კელის დუეტი შეათამაშა, მაგრამ ისინი შორს არიან იმ დონისგან, რასაც "ბორუსია" გასულ სეზონში აჩვენებდა. ასევე, დიდი კითხვის ნიშნის ქვეშაა იაკუბ ბლაშიკოვსკის თამაშიც.
დიდი ალბათობით, დორტმუნდელთა თავკაცი 4–2–3–1 სქემას გამოიყენებს. მარჯვენა ვინგერად პიერ–ემერიკ ობამეიანგი ითამაშებს, ფლეიმეიქერის პოზიციაზე ჰენრიხ მხითარიანი, მარცხენა ვინგერად კი მარკო როისი.
თავდასხმა
რობერტ ლევანდოვსკი მადრიდში გასამართ პირველ მატჩს დისკვალიფიკაციის გამო გამოტოვებს. სავარაუდოდ, იურგენ კლოპი ცენტრფორვარდად იულიან შიბერს (წლევანდელ სეზონში ყველა ტურნირის ჩათვლით 13 მატჩი ჩაატარა: 244 წუთში 1 გოლი და 1 ასისტი) გამოიყენებს. თუმცა, არ არის გამორიცხული, ამ პოზიციაზე ობამეიანგმა გადაინაცვლოს, ხოლო მარჯვენა ვინგერად იონას ჰოფმანი ვიხილოთ.