ამასთან ერთად, კასილასმა თანაგუნდელებისგანაც მიიღო მხარდაჭერა. ყოველი სეივის შემდეგ, მასთან მცველები მიდიოდნენ და მას აქებდნენ. კოენტრაუ და კარვახალი იკერთან ყოველ ჯერზე მიდიოდნენ და მას თავდაჯერებულობას აძლევდნენ.
მატჩის დასრულების შემდეგ, კასილასთან გუნდის ყველა მცველი მივიდა და კაპიტანს გადაეხვია, რომელმაც მორიგ მატჩში შეძლო კარის "მშრალად" შენახვა. ასეთი შედეგის ფონზე, იკერი ხვდება, რომ გუნდი ნახევარფინალშია და მას კიდევ მოუწევს კარის დაცვა. გარდა ამისა, ესპანელმა გოლკიპერმა 16 აპრილს, "ბარსელონასთან", სამეფო თასის ფინალშიც უნდა იასპარეზოს. წლევანდელ სეზონში კასილასი "რეალის" თილისმაა. იკერმა 16 შეხვედრაში მიიღო მონაწილეობა. აქედან, გუნდმა 15 მოიგო და მხოლოდ 1 ფრე ითამაშა, სტუმრად "იუვენტუსთან" (2:2).
კასილასმა ამ 16 მატჩიდან 11 "მშრალად" ჩაატარა. წლევანდელ სეზონში მან საკუთარი და "რეალის" რეკორდიც დაამხო, რომელიც პაკო ბუიოს ეკუთვნოდა.
ჩემპიონთა ლიგის მერვედფინალური ეტაპის პირველ მატჩში, ჰუნტელაარის მიერ გატანილმა დიდებულმა გოლმა, იკერის "მშრალი" სერია შეაჩერა. მანამდე ესპანელს 952 წუთი არ ჰქონდა გოლი გაშვებული.