"სამეფო კლუბმა" პირველ შეხვედრაში, ესპანეთის დედაქალაქში, სწორედ იმდენი გოლი გაუტანა გერმანელებს, რამდენიც შარშან, საპასუხო მატჩის წინ ესაჭიროებოდათ. ესპანელები ძალიან კომფორტულად ლიდერობენ პირველი მატჩის შემდეგ, ამიტომ, მათი ჩემპიონთა ლიგის ნახევარფინალში ზედიზედ მეოთხედ გასვლის საკითხი უბრალოდ ფორმალობას ჰგავს.
მადრიდული გრანდი კიდევ ერთხელ ეწვევა სტადიონს, რომელზეც მათ უკანასკნელი წლების მანძილზე ერთ-ერთი ყველაზე მტკივნეული და მძიმე მარცხი განიცადეს. თუმცა, ახლა უპირატესობა მათ მხარესაა. ამჟამად, დორტმუნდის "ბორუსიას" ის 4-1-ც აღარ შველის, რომელიც გასულ წელს დაფიქსირდა. წინა კვირას, კერძოდ კი ოთხშაბათს, გერმანიისა და ესპანეთის ვიცე-ჩემპიონების პირველი დაპირისპირება 3:0 დასრულდა, რაც უდიდეს უპირატესობას აძლევს მადრიდულ კლუბს.
გასულ უიქენდზე ორივე კლუბმა ჩაატარა მატჩები საკუთარ ჩემპიონატში. მაგრამ, თუ "დორტმუნმა" საკუთარ მოედანზე გაჭირვებით დაამარცხა "ვოლფსბურგი", "რეალმა" "ანოეტაზე" "სოსიედადს" გადაურბინა. არადა, "ბლანკოსს" ყველა ურთულეს მატჩს უწინასწარმეტყველებდა. ანჩელოტის გუნდი ნანატრ დესიმას უახლოვდება.
აღსანიშნავია, რომ მადრიდის "რეალი" პირველ მატჩში 3:0-ს მოგების შემდეგ არასოდეს გამოვარდნილა გათამაშებიდან, რაც იმას ნიშნავს, რომ ანჩელოტის შეგირდებს დორტმუნში მშვიდად ჩასვლა და ნახევარფინალის საგზურის გაფორმება შეუძლიათ.