მადრიდის რეალის ვებ-გვერდი

"სამეფო გუნდს" კარგად ახსოვს, თუ ვისთან დამარცხდა და თან რა მტკივნეულად წინა სეზონის ჩემპიონთა ლიგაში და მადრიდელები ყველანაირად შეეცდებიან, სრულფასოვანი რევანში აიღონ და სამაგალითოდ იძიონ შური. 

"რეალი" შეეცდება, "დორტმუნდის" არც ისე კარგი სათამაშო ფორმით ისარგებლოს და წყვილში აშკარა ფავორიტადაც მიიჩნევა, მაგრამ ერთ რამეში შეგვიძლია დარწმუნებულნი ვიყოთ - გერმანელები, როგორც ყოველთვის, ბოლომდე იბრძოლებენ და მაქსიმუმს გაიღებენ. 

თანაც, იურგენ კლოპის ბიჭებს საშინაო არენაზე საქმეები არც ისე კარგად მისდით და კომპენსირებას ევროსარბიელზე შეეცდებიან. სიურპრიზები კი დორტმუნდელებმა უკვე იმდენგზის შემოგვთავაზეს, რომ გამორიცხული მართლაც არაფერია, მაგრამ "სანტიაგო ბერნაბეუზე" ყოველთვის ერთი ფავორიტია...

მატჩის წინ
კარლო ანჩელოტი (რეალი): 
"ჩვენ ამ ტურნირზე თამაშის გამოცდილება ნამდვილად გვაქვს, მაგრამ იმავეს ვიტყვით სხვა გუნდებზეც. ვფიქრობ, ჩემპიონთა ლიგას ამ ეტაპზე საუკეთესო კლუბები შემორჩნენ, რაც იმითაც მტკიცდება, თუ როგორი დაძაბული და საინტერესო წყვილები მივიღეთ წილისყრის მერე. ამიტომაც ძალიან ფრთხილად უნდა ვიყოთ. 

ამჟამინდელი მეტოქე ძალიან ძლიერია. "დორტმუნდს" რობერტ ლევანდოვსკის დარი ფეხბურთელი აკლია, მაგრამ ამ კლუბის სტილი, რაც უნდა იყოს, უცვლელია. 

გერმანელებს კომპაქტური გუნდი ჰყავთ, რომელიც თავსაც კარგად იცავს და შეტევაშიც სწრაფად გადადის. მათი კონტრიერიშები ძალიან სახიფათოა. ყურადღებით უნდა ვიყოთ და საკუთარი პლუსები გამოვიყენოთ, რათა სასურველ შედეგს მივაღწიოთ".ტრადიციულად ღიმილიანი და მხიარული იყო იურგენ კლოპი (დორტმუნდი): 
"ჩვენ ძალიან ბევრი ფეხბურთელი გვაკლია, მათ შორის, ლევანდოვსკი, რომელსაც, სხვათა შორის, ყვითელი ბარათი საკამათო სიტუაციაში სწორედ ესპანელმა მსაჯმა უჩვენა... 

თუმცა მე კიდევ არაერთი კარგი მოთამაშე მყავს. ბოლო მომენტამდე უნდა ვიბრძოლოთ, რადგან სხვაგვარად ასეთ მეტოქესთან შეუძლებელია. 

"რეალის" ბევრი თამაში მაქვს ნანახი და მადრიდელებს ყველა შეხვედრაში მრავლად სახიფათო მომენტი ექმნებათ და სრულად კონცენტრირებულნი უნდა ვიყოთ, რათა ის უპირატესობა შევინარჩუნოთ, რომელსაც საპასუხო მატჩის საკუთარ კედლებში ჩატარება გვაძლევს - "სანტიაგო ბერნაბეუზე" ღირსეულად უნდა ვითამაშოთ".

ბოლო მატჩი
რეალი: 
კარლო ანჩელოტის გუნდმა განწყობა ისეთი შეიქმნა, როგორიც უნდა - 5:0 "რაიო ვალეკანოსთან" მადრიდულ დერბიში. თავის გამოჩენა დანი კარვახალმაც კი მოახერხა. გარდა ამისა, რასაკვირველია, გაიტანა კრიშტიანო რონალდომ, ასევე, ალვარო მორატამ, ხოლო გარეთ ბეილმა დუბლი გაახერხა. 

თუმცა "სამეფო გუნდი" ამჟამად ლა ლიგაში მე-3 ადგილზეა და იქ სიტუაციის გამოსწორებამდე ფანებს გული "დორტმუნდთან" ვენდეტათი უნდა მოფხანოს.

დორტმუნდი: 
კარგ გუნებაზე ხვდება მატჩს "დორტმუნდიც", რომელიც "შტუტგარტთან" 0:2-ს აგებდა, მაგრამ ქამბექი შემოგვთავაზა და მატჩის გმირის, მარკო როისის ჰეთ-თრიქით 3:2 იმარჯვა. 

მართალია, როისმა ანგარიში პენალტით გაათანაბრა და თან იმ მომენტში შტუტგარტელები ათი კაცით დარჩნენ, მაგრამ ეს დორტმუნდელთა მიღწევას არ აკნინებს. 

მშვენიერ ხასიათზეა კლოპიც, მაგრამ დანაკლისი მას მართლაც სოლიდური აქვს - რობერტ ლევანდოვსკი, მარსელ შმელცერი, იაკუბ ბლაშჩიკოვსკი, სვენ ბენდერი, ნევენ სუბოტიჩი, ილქაი გიუნდოგანი...

ყველაზე დიდი დანაკლისი
რეალი: სამი ხედირა, მარსელო
დორტმუნდი: რობერტ ლევანდოვსკი

ჩემპიონთა ლიგა. 1/4-ფინალი. პირველი მატჩი
02.04. მადრიდი. "სანტიაგო" ბერნაბეუ. 22:45
რეალი-დორტმუნდი
არბიტრი: მარკ კლატენბურგი (ინგ)

ბოლო 6 მატჩი ლიგაზე
5-1-0    4-0-2

სავარაუდო შემადგენლობები: 
რეალი (4-3-2-1):კასილიასი - კარვახალი, პეპე, ს. რამოსი, ნაჩო - მოდრიჩი, დი მარია, ჩაბი ალონსო - ბეილი, რონალდო - ბენზემა.
დორტმუნდი (4-2-3-1): ვაიდენფელერი - პიშჩეკი, პაპასტატოპულოსი, ჰუმელსი, დურმი - კელი, ნ. შაჰინი - ობამეიანგი, მხითარიანი, გროსკროიტცი - როისი
დისკვალიფიკაცია: - ლევანდოვსკი
ტრავმა: არბელოა, ხედირა, ხესე, მარსელო - სუბოტიჩი, ბლაშჩიკოვსკი, შმელცერი, ს. ბენდერი, გიუნდოგანი, ბანდოვსკი