მადრიდის "რეალმა" თვალი ედენ აზარსა და ოსკარს დაადგა, რომელთა გადაბირებითაც დიდი ხანია "პსჟ" ინტერესდება...
ცნობილი გახდა, რომ "არისტოკრატების" თავკაცი, ჟოზე მოურინიო, ზაფხულში გუნდში გვარიანი "წმენდის" ჩატარებას გეგმავს. ამიტომ, ბევრი ევროპული კლუბი უკვე ინტერესდება "ჩელსის" ფეხბურთელების შეძენით.
ესპანური პრესის ცნობით, მადრიდის "რეალი" მზადაა ფრანგულ "პსჟ"–ს ლონდონური კლუბის ორი ფეხბურთელის ტრანსფერში შეებრძოლოს. საუბარია ბელგიელ ედენ აზარსა და ბრაზილიელ ოსკარზე, რომელთა შეძენითაც დიდი ხანია პარიზელები ინტერესდებიან.
"სამეფო კლუბის" ხელმძღვანელობა მზადაა "ლურჯებს" სარფიანი წინადადებით მიმართოს. თუმცა, ჯერჯერობით თანხა არ სახელდება. თუ მხარეები შეთანხმებას მიაღწევენ, ტრანსფერი შესაძლოა ამავე ზაფხულს შედგეს.
ცოტა ხნის წინ მიცემულ ინტერვიუში აზარმა განაცხადა, რომ კლუბის შეცვლაზე დაფიქრდება, თუ ამას მისი საყვარელი მეუღლე მოისურვებს.
