ოთხშაბათს ხუანიტოს გარდაცვალებიდან 22 წელი გავიდა - მადრიდისტებისთვის ერთ-ერთი ყველაზე ლეგენდარული, ქარიზმატული და საყვარელი ადამიანის. "ბორუსიასთან" შეხვედრამ აჩვენა, რომ მადრიდული სული, რომლის მატარებელიც ეს დიადი ფეხბურთელი იყო, არსად წასულა: კეპლერ ლავერან ლიმა ფერეირა, ან უბრალოდ პეპე გახდა ის ფეხბურთელი, რომელმაც ნამდვილი საჩემპიონო ხასიათი გამოავლინა. მისი დაუღალავი ენერგია მოტივაციას ჰმატებდა როგორც მის თანაგუნდელებს, ისე "სანტიაგო ბერნაბეუს". ის ერთდროულად იყო გადამრჩენელი და მბრძანებელი, რომელმაც მეტოქის შეტევები ყველაზე სახიფათო სტადიაზე ჩაახშო. ზოგადად, "რეალის" უმთავრესი მიღწევა "დორტმუნდთან" შეხვედრაში არის არა სტუმართა კარში გატანილი სამი გოლი, არამედ საკუთარი კარის მშლარად შენახვა. ამაში უდიდესი წვლილი მიუძღვის იკერ კასილასს, რომელიც კიდევ ერთხელ გახდა "თეთრების" თილისმა და პეპეს, რომელიც გრძელი და წვიმისგან დასველებული თმით რომელიღაც მითოლოგიურ გმირს ჰგავდა. "ბორუსია", მიუხედავად გამანადგურებელი ანგარიშისა, სულაც არ იყო გაჭყლეტილი და თავისუფლად შეეძლო თავის გამოჩენა როგორც ერთხელ, ისევე მეტჯერ. ანგარიში 3-1 ან 3-2 კი უკვე საპასუხო შეხვედრის წინ სულ სხვა ისტორია იქნებოდა. მაგრამ ეს არ მოხდა და "რეალი" დორტმუნდში პირველ შეხვედრაში მოპოვებული დიდი უპირატესობით ჩავა. ეს კი, გავიმეორებ, პირველ რიგში იმის დამსახურებაა, რომ ამ საღამოს გუნდს ნამდვილი ლიდერი ჰყავდა: პეპე, ან როგორც მას სხვანაირად ეძახიან პეპენბაუერი. მან დაამტკიცა, რომ ლეგენდარულ გერმანელთან შედარებას ნამდვილად იმსახურებს.
"რეალის" შემტევი ხაზი კითხვებს არ ტოვებს: გარეთ ბეილმა გამოაჩინა, რომ სეზონის გადამწყვეტ შეხვედრებში დიდებულად ასპარეზობის ძალა შესწევს. ვფიქრობ, თუ მან ასე გააგრძელა, მის გაწელილ ადაპტაციაზე უკვე აღარავინ ისაუბრებს. რაც შეეხება ისკოს, რომელმაც დიდებული შეხვედრა ჩაატარა, ვისურვებდი, რომ ის დორტმუნდში გამართულ შეხვედრაშიც ძირითადში იყოს, რადგან მას გასული წლის მეოთხედფინალის მოგონებები კიდევ შემორჩა, როდესაც მსაჯებმა "მალაგა" ნახევარფინალში არ გაუშვეს. კრიშტიანუმ ჩემპიონთა ლიგაზე თავის მეასე შეხვედრაში მოახერხა გოლის გატანა და ევროპის ყველაზე პრესტიჟულ ტურნირში გატანილი გოლებით თვით ალფრედო დი სტეფანოს გაუტოლდა - ახლა ორივეს ანგარიშზე 49 გოლია. ოღონდ, ალფრედომ ეს 58 შეხვედრაში მოახერხა, პორტუგალიელმა კი - 48-ში. გარდა ამისა, ჩემპიონთა ლიგაზე ის უკვე ზედიზედ 11 მატჩია მოედანს გოლის გარეშე არ ტოვებს.
მაგრამ "დორტმუნდთან" გამარჯვების მთავარი შედეგი - "რეალის" რეაბილიტაციაა გულშემატკივრების წინაშე "ბარსასა" და "სევილიასთან" მარცხის შემდეგ. ახლა უკვე ვეღარავინ იტყვის, რომ ახლანდელი "მადრიდი" ძლიერი მეტოქეებთან თავს სათანადოდ ვერ იჩენს: "ბორუსია", მიუხედავად ბევრი წამყვანი ფეხბურთელის არყოფნისა, ძალიან მებრძოლი და ჭკვიანი გუნდია, რომელიც ნიჭიერმა სპეციალისტმა, იურგენ კლოპმა ააშენა. მათ ნებისმიერი მეტოქის დამარცხება შეუძლიათ და "რეალის" ამ გამარჯვებას არანაირი მსგავსება ჰქონია "შალკეს" გელზენკირხენში განადგურებასთან - მაშინ ყველაფერი ადვილად იყო, ოთხშაბათს, "ბერნაბეუზე" კი, ასე ნამდვილად არ ყოფილა.