მადრიდის რეალის ვებ-გვერდი

ევროპის ყველაზე პრესტიჟული ტურნირის შარშანდელ გათამაშებაში “დორტმუნდი” და “რეალი” ერთმანეთს 4-ჯერ დაუპირისპირდნენ. 2-ჯერ ჯგუფურ ეტაპზე, 2-ჯერ კი ნახევარფინალში. აქედან ესპანელებმა მხოლოდ ერთი მატჩის მოგება შეძლეს. თუმცა ყველა მაინც 2013 წლის 24 აპრილს იხსენებს. საღამოს, როცა იურგენ კლოპის ბიჭებმა მრისხანე მეტოქის კარი 4-ჯერ აიღეს! “სამეფო გუნდმა” რობერტ ლევანდოვსკიმ იმ დღეს პოკერი შეასრულა. ერთადერთი ბურთი კი კრიშტიანუ რონალდუმ პირველი ტაიმის მიწურულს გაქვითა. 

ნახევარფინალის პირველი მატჩის შედეგის გათვალისწინებით, აშკარა ფავორიტი გამოიკვეთა. მიუხედავად იმისა, რომ განმეორებითი მატჩი “სანტიაგო ბერნაბეუზე” უნდა გამართულიყო, თითქმის ყველა ფიქრობდა, რომ “რეალი” განწირული იყო. ჟოზე მოურინიოს დამოძღვრილმა ბიჭებმა შემართებით ითამაშეს, ორი ბურთიც გაიტანეს, თუმცა ეს იყო და ეს. ლევანდოვსკის “ბერნაბეუზეც” ჰქონდა გატანის შანსი. პოლონელს ოდნავ არ გაუმართლა. სწორედ ამ ორრაუნდიანი დაპირისპირების შემდეგ წამოვიდა სატრანსფერო ჭორები. ძალიან დიდი ხნის განმავლობაში რობერტს “რეალთან” აკავშირებდნენ. ყოველ დღე იწერებოდა ჟურნალ-გაზეთებში, რომ ფლორენტინო პერესს ფეხბურთელის შეძენა სურდა და ამისთვის ყველაფერს გააკეთებდა. საბოლოოდ “ოქროს ბიჭუნა” მიუნხენის “ბაიერნს” ჩაუვარდა ხელში და მიმდინარე სეზონსი ბოლოს ოფიციალურადაც მოირგებს “ბავარიელთა” ნაქებ ფორმას. მოკლედ, ისედაც ცნობილი მოთამაშე “სამეფო გუნდთან” მატჩის შემდეგ სუპერ-ვარსკვლავი გახდა. აბა როგორ გინდა, “რეალს” 4 ბურთი გაუტანო და ისიც ერთ შეხვედრაში? სამწუხაროა, რომ დისკვალიფიკაციის გამო ლევანდოვსკი 1/4 ფინალის პირველ მატჩში ვერ ვიხილავთ. შეიძლება ამან სავალალო შედეგიც გამოიღოს გერმანელთათვის, ვინაიდან “ბორუსია” ის ნამდვილად აღარ არის, რაც შარშან იყო, თუმცა ვინ იცის? 

სტატისტიკა 

ახლა სტატისტიკასაც გადავავლოთ თვალი. უეფას მონაცემებით, “რეალი” ამჟამად მე-4 პოზიციას იკავებს, “დორტმუნდი” კი 31-ე ადგილზეა. ჩემპიონთა ლიგაზე ერთმანეთში ამ გუნდებს 8 მატჩი ჩაუტარებითა. პირველად 1998 წლის პირველ აპრილს ნახევარფინალში. “რეალმა” იმ დღეს 2:0 დაამარცხა მეტოქე. საპასუხო შეხვედრა გერმანიაში ნულოვანი ფრით დასრულდა და ფინალშიც ესპანელები გავიდნენ. 2003 წელს გუნდები ერთ ჯგუფში მოხვდნენ. “ბერნაბეუზე” ამჯერადაც “რეალმა” იმარჯვა 2:1, სტუმრად კი კვლავ ფრე (1:1) დაფიქსირდა. შარშანდელი სეზონის მატჩებზე კი ზემოთ ვრცლად ვისაუბრე. 

საერთო ჯამში, 8 შეხვედრიდან “რეალს” 3 მოგებული აქვს, 3 ფრე და 2 მარცხი. “დორტმუნდის” სტატისტიკა კი ასეთია: 2 მოგება, 3 ფრე და 3 მარცხი. “რეალს” “ბორუსიას” კარში 11 გოლი აქვს გატანილი, “დორტმუნდს” კი “რეალისთვის” – 10. თუმცა აქვე ერთი ფაქტი: ყველაზე დიდი ანგარიშით “რეალმა” “დორტმუნდი” შარშან დაამარცხა (2:0), ხოლო “დორტმუნდმა” “რეალი” – 4:1. 

რა მდგომარეობაში არიან გუნდები ამჟამად? 

ანჩელოტის გუნდი ლა ლიგის სათავეშია. მადრიდის “რეალმა” ბოლო ოფიციალური მატჩი 26 ოქტომბერს წააგო. გახსოვთ ალბათ, “ელ კლასიკო” (2:1). მას შემდეგ კარლო ანჩელოტის გუნდმა 32 მატჩი გამართა, აქედან 5 ფრედ ითამაშა და 27 მოიგო! 88 გოლი გაიტანა და 16 მიიღო საკუთარ კარში. ამ გათამაშების ჯგუფურ ეტაპზე სწორედ “რეალმა” გაიტანა ყველაზე მეტი, 20 გოლი. კრიშტიანუ რონალდუ ბრწყინვალე ფორმაშია. მნიშვნელოვან გოლებს იტანს გარეტ ბეილი. მოკლედ, წინა ხაზში გუნდს არანაირი პრობლემა არ აქვს და, თუ სტატისტიკას ყურადღებით წავიკითხავთ, ადვილად მიხვდებით, რომ “თეთრების” დაცვის ხაზიც ძალიან საიმედოა. “რეალი” ოცნების გუნდს ჰგავს, თუმცა ოცნების გუნდები ლიგის ფინალში თამაშობენ და იგებენ. მადრიდელ ქომაგს დიდი ხანია ეს ბედნიერება არ ღირსებია. ექსპერთა აზრით, მიმდინარე სეზონი უნდა გამოდგეს მათთვის სიხარულის მომტანი. ვნახოთ, ჯერ “ბორუსიაა”! 

დორტმუნდის “ბორუსია” ბუნდესლიგის სატურნირო ცხრილში მეორე ადგილს იკავებს, მაგრამ ლიდერ “ბაიერნს” 23 ქულით ჩამორჩება. აქ ყველაფერი ნათელია, გერმანიის ჩემპიონი პეპ გუარდიოლას გუნდი გახდება, კლოპმა კი მთელი ყურადღება ლიგაზე უნდა გადაიტანოს. დორტმუნდელებს ბოლო 2 მატჩი წაგებული აქვთ. თუმცა იქამდე 14 მატჩში 1 მარცხი, 1 ფრე და 12 მოგება ჰქონდათ. გუნდის მთავარ დამრტყმელ ძალად ლევანდოვსკი რჩება. ბუნდესლიგაში პოლონელს 24 მატჩში 15 გოლი აქვს გატანილი. მეორე ბომბარდირი ობამეიანგია, რომელმაც ასეთივე რაოდენობი მატჩებში 13 გოლის შეგდება შეძლო. სერიოზულ ძალას წარმოადგენს მარკო როისიც, რომელსაც 8 ბურთი აქვს გატანილი. 

ჩემპიონთა ლიგის ამ გათამაშებაში ლევანდოვსკის 6 გოლი აქვს გატანილი და ბომბარდირთა სიის მე-7 ადგილზეა. ამ მხრივ, “დორტმუნდი” “რეალს” კონკურენციას ნამდვილად ვერ გაუწევს, რადგან კრიშტიანუ რონალდუ 13 გოლით პირველ პოზიციაზე დგას! პორტუგალიელმა ვარსკვლავმა ამდენი გოლი 630 წუთში გაიტანა, ლევანდოვსკიმ კი – 719 წუთში. 4-4 გოლი აქვთ გატანილი გარეტ ბეილსა და ქარიმ ბენზემას. 

სტატისტიკა ფეხბურთის განუყოფელი და ძალიან საინტერესო ნაწილია, თუმცა, ალბათ ყველა დამეთანხმება, არა გადამწყვეტი. ამ თამაშში ყველაფერი მწვანე მინდორზე ხდება. გუნდები გასახდელიდან გამოდიან, სტადიონი გუგუნებს, ისმის ჰიმნი, ჩემპიონთა ლიგის ჰიმნი, მუსიკა, რომელიც ყველა ერის წარმომადგენელს ერთნაირად ჩაესმის ყურში და აღაფრთოვანებს. გაისმის მსაჯის სასტვენის ხმა და იწყება ბრძოლა. იქ ციფრებზე უკვე აღარავინ ფიქრობს.