გუშინ ჩემპიონთა ლიგის 1/4 ფინალის ორი საპასუხო მატჩი გაიმართა. ლონდონის “ჩელსიმ” და დორტმუნდის “ბორუსიამ” თავიანთი მატჩები ორი ბურთის სხვაობით მოიგეს. ლონდონელებმა ნახევარფინალის საგზური გაინაღდეს, თუმცა “ბორუსიელებს” კი ორბურთიანი ჰანდიკაპი შემდეგ ეტაპზე გასასვლელად არ ეყოთ. 2013 წელს “ბორუსია” და “რეალი” ერთმანეთს ნახევარფინალში დაუპირისპირდნენ. იქ “დორტმუნდელებმა” თავიანთ მოედანზე მეტოქის განადგურება (4:1) მოახერხეს. განმეორებით შეხვედრაში კი ზუსტად იგივე სცენარი განვითარდა, რაც გუშინდელ მატჩში, თუმცა გუნდებმა როლები გაცვალეს. ჟოზე მოურინიოს “რეალმა” (2-0) იმარჯვა, მაგრამ შემდეგ ეტაპზე გასვლა ვერც მათ მოახერხეს. იმ მატჩში “დორტმუნდელთა” უმთავრესი გმირი რობერტ ლევანდოვსკი იყო. გუშინდელ შეხვედრაში გატეხილი “ბორუსია” მორიგი სენსაციის გაკეთებას გეგმავდა. მატჩის დებიუტშივე ჩანდა, რომ “ბორუსია” უკან არაფერზე დაიხევდა. მარკო როისი, რობერტ ლევანდოვსკი და ჰენრიკ მხითარიანი თავიანთი გუნდის შეტევებს ძალიან ამწვავებდნენ. მიუხედავად ამისა, მატჩის მე 16-ე წუთზე “ბორუსიელთა” კარში თერთეტმეტრიანი დაინიშნა. ბურთთან ანხელ დი მარია მივიდა, თუმცა არგენტინელის დარტყმული რომან ვაიდენფელერმა მოიგერია. ამის შემდგომ, “ბორუსიამ” ბრწყინვალე შეტევის გაკეთება მოახერხა, მაგრამ მხითარიანმა ძალიან ახლო მანძილიდან ბურთი კარს ააცილა. ასეა თუ ისე, იურგენ კლოპის გუნდი რაღაცას ამზადებდა, თუმცა თავიდან მათ არ უმართლებდათ. შარშანდელი ფინალისტი გუნდი ძალიან კარგად თამაშობდა, ისინი მეტოქის ნახევარზე სწრაფ და ენერგიულ პრესინგს მიმართავდნენ. მადრიდის “რეალის” ცენტრის სუსტი მხარე ილიარამენდი იყო. მიუხედაად ამისა, მატჩის 24-ე წუთზე “რეალის” პორტუგალიელი მცველი პეპე შეცდა და ამ შეცდომით მარკო როისმა ისარგებლა. გერმანელმა შემტევმა მატჩში ანგარიში გახსნა და თავისი გუნდი დააწინაურა. “სიგნალ იდუნა პარკზე” შეკრებილი გულშემატკივრები თავიანთ საყვარელ გუნდს მაქსიმალურად ამხნევებდნენ, რაც “ბორუსიის” ფეხბურთელებში ბრძოლისუნარიანობას და გამარჯვების რწმენას მატებდა.
დორტმუნდელების აქტიურ პრესინგს ხშირად მადრიდელების მხირდან უხეში თამაში მოჰყვებოდა. მარკო როისმა ერთ-ერთ ეპიზოდში კინაღამ ტრავმაც მიიღო. მატჩის პირველი ნახევარი ძალიან სანახაობრივად, სწრაფად და დინამიური შეტევებით მიმდინარეობდა. ასეთ თამაშში, როგორც წესი, მაღალია ფეხბურთელების ტრავმის ალბათობაც. მატჩის პირველი ნახევრის მიწურულს “ბორუსიელებს” გოლის გატანის რამდენიმე შანსი გაუჩნდათ. ერთ-ერთი სტანდარტიდან დარტყმული ბურთი მადრიდელთა კარის დარაჯმა იკერ კასილიასმა მოიგერია. შეხვედრის 37-ე წუთზე ილიარამენდიმ უკან უმისამართო პასი გააკეთა, რომელიც მარკო როისმა ჩაჭრა. გერმანელმა ფეხბურთელმა სწრაფად წამოიწყო შეტევა და პასი რობერტ ლევანდოვსკის გადააწოდა, რომლის დარტყმულიც ძელს მოხვდა, თუმცა დამატებაზე გოლის გატანა მარკო როისმა შეძლო. მოკლედ, როგორც ხედავთ მატჩში არა მხოლოდ “ბორუსიას”, არამედ “რეალსაც” არ უმართლებდა. გაცუდებული თერთმეტმეტრიანი და + ორი მიღებული ბურთი, რომლის მთავარი მიზეზიც მადრიდელთა ცუდი თამაში იყო.
მატჩის მეორე ნახევარი, როგორც მოსალოდნელი იყო მადრიდელებმა აქტიურად დაიწყეს. გარეტ ბეილი და ანხელ დი მარია ხშირად შორეული დარტყმით ცდილობდნენ მეტოქის კარის დალაშქვრას, თუმცა ხან რომან ვაიდენფელერი თამაშობდა კარგად და ხან დარტყმა იყო არაზუსტი. მეორე ტაიმში მოედნის ნებისმიერ მონაკვეთში თავგანწირული ბრძოლა მიმდინარეობდა. ნებისმიერ შეცდომას, ან დაკარგულ ბურთს უხეში თამაში მოჰყვებოდა. მატჩის 65-ე წუთზე “ბორუსელთა” ნამდვილმა “გმირმა” მარკო როისმა მორიგი შეტევა წამოიწყო და მეკარესთან პირისპირ ჰენრიკ მხითარიანი დატოვა, რომელმაც კასილიასის მოტყუება შეძლო, თუმცა ცარიელ კარში ბურთი ძელს გაარტყა. როგორც ხედავთ, სომეხმა ფეხბურთელმა “სიგნალ იდუნა პარკზე” შეკრებილი გულშემატკივრები მეორედ დაამწუხრა. მოგვიანებით, ლევანდოვსკი-როისის კომბინაციის შედეგად დასარტყმელ პოზიციაზე მხითარიანი დარჩა, თუმცა ჰენრიკმა გოლის გატანა ვერც ამჯერად მოახერხა. საბოლოოდ შეიძლება ითქვას, რომ ჩვენ გუშინდელ მატჩში ყველაფერი ვნახეთ: გაცუდებული თერთმეტმეტრიანი, მატჩის გმირი, მატჩის მთავარი იმედგაცრუება და რაც მთავარია შეხვედრა იყო ძალიან სანახაობრივი. “ბორუსიის” ფეხბურთელებმა ყველაფერი გააკეთეს იმისათვის, რომ შემდეგ ეტაპზე გასულიყვნენ. მათ დაამტკიცეს, რომ მართლაც ძალიან ძლიერი გუნდი ჰყავთ და სენსაციების გაკეთება ნამდვილად შეუძლიათ. მხითარიანს სამ ეპიზოდში შეეძლო გოლის გატანა, თუმცა ვერცერთხელ მოახერხა. უბრალოდ უიღბლო მხითარიანი და განწირული “ბორუსია”!